Dem boys seh…Brazzy ketching he hand again
Couple months back de government bring in some cow, but no bull, because dem plan to artificially inseminate de cow. But until then de plan was fuh Leslie jump dem cow because he was de expert. Well de insemination thing come. Was a time wid Leslie.
De Big Market paper ketch Leslie watching de instrument wid longing eyes Tuesday. De foreign expert ask he if he wanted to tek a trial. And Leslie smile. Dem boys want to know wha gun happen when dem lef Leslie alone wid that instrument. Dem wouldn’t be surprise if he inseminate heself.
That ain’t de only strange thing that might happen. De government ain’t build a hotel yet, but it busy selling out de only parts of de hotel that gon mek money. Dem boys plan fuh express some interest and see if dem gun get accept. Dem got experience in gambling because every day dem listen to dem politicians dem got to tek a gamble that de politicians telling de truth.
Dem know bout cooking because all of dem live batchee and dem got to cook so dem can cater fuh everybody, especially all dem who got wife who can’t cook. De nightclub ain’t no problem because all dem got to do is talk to GPL and dem gun get blinking lights whole night.
De problem gun come when Brazzy see how much money dem mekking, because he is a man don’t like see money. That is why he selling out dem things even before de hotel build.
Is one thing though. Dem boys want to know who gun invest in a hotel that ain’t got no entertainment or gambling. Dem boys done decide that dem gun bar all de hotel guests from de casino and de night club, suh Brazzy gun really suck salt.
Talk half and wait fuh de backlash.