Dem boys seh…Dr. Ramroop can run but he can’t hide
Dr. Bobby Ramroop can run all he want but he can’t hide. Dr. Bobby Ramroop, and not a cow doctor,—a medical doctor— got to be stupid. A reporter just ask he how come he bid suh high fuh couple malaria drugs and he get vex and start buse. Like people can’t ask he nutten.
He just like Bharrat Jagdeo. When reporters use to ask he a question at a press conference if de question was bout something he do he use to get vex. Dr. Ramroop and he is best of friends and dem got de same attitude. Dem boys seh that de doctor had to learn from Jagdeo.
This man got to be de richest doctor. He own a newspaper, a TV station wha’ he get from Vieira, he get a radio licence (dem boys seh from Jagdeo), he own New GPC and de old Sanata Complex wha got a ton of companies inside. And that is only some wha’ dem boys want talk about now. He got plenty more.
Most times he use to be de only supplier fuh de Ministry of Health. This was from since Jagdeo was Finance Minister. Up to now he alone does get some contract. Nuff time people never know bout dem contract. Imagine de price wha’ Guyana was paying fuh de drugs, because all this use to happen in de daak.
This time in de daylight, dem boys see one man bid $32 Million and he bid $261 million fuh de same products. That is $228 million more than wha de other man bid.
When de Big market paper phone he fuh ask he fuh an explanation he get vex and buse down. He claim how de Big Market paper and de Waterfalls paper always attacking he and he company.
He also tell de reporter that he can’t give fact because de place daak and he is a man bin love to do things in de daak. He never address de issue although he put out a statement on de matter.
Dem boys plan fuh ask he agaaain how come he charge so much and he can get vex agaaain.
Talk half and prepare fuh smell dem cold hyan bars in Uncle Sam.