Dem boys seh…Rodrigues going to Peter wid he lawyer
Deepest sympathies to the relatives of Ricardo Rodrigues and Vic Puran. Dem was two people who dead sudden and dem death send shock waves throughout de country.
Rodrigues death lef nuff people wid dem mouth open. Puran was Rodrigues friend and lead lawyer. Every case Rodrigues had was Puran who was representing he.
When dem boys hear that Puran dead hours after Rodrigues dem seh that it look like if Puran decide that he had to go fuh defend he friend in de next life. He couldn’t lef Rodrigues alone.
He know that when Rodrigues meet St Peter at de Pearly Gates he got to get a proppa lawyer and a liar. Puran like many of dem wha call demself lawyer, does wear both caps. Ask Anil de Ganda Lall.
Now dem boys want to know if Rodrigues got other lawyers pun de list fuh join he. Anil de Ganda Lall planning fuh send a message to Uncle Donald that he done wid law. He use to represent Rodrigues too.
Then dem have Glenn, not Glenn Lall. He is not a lawyer. De other Glenn seh that he don’t tek case beyond de shores of Guyana. He seh that if any senior counsel want to go dem can go, but he not going one way.
Dem ask Khemraj, Moses, Nigel, Harmon, Bond, Debbie Backs, and Basil de Willie whether dem prepare fuh join Rodrigues defence team. Basil de Willie was de fuss one to holler not he. De word barely come out he mouth and all de rest chime in. Dem claim dem refuse to tek case out de air space of Guyana.
In life Rodrigues and Puran was decent people. Dem never walk anyhow. If dem naked dem always had towel wrap round dem. When was de post mortem dem two man lie down side by side, naked as dem born in front of Uncle Knee All.
That is why dem boys seh that people does lef this world just like how dem come in. Anyhow, dem know de pain that de relatives feeling and dem offer deepest sympathy.
Talk half and pray fuh dem soul.