Dem boys seh…Leslie got to pump fuh Rob Earth
Rob Earth is a man who don’t like see money. He sit in Cabinet and hear that dem got money fuh dig drain. Right away he create a condition. He claim how dem got El Nino and he got to spend $700 million pun drains.
When he done spend de money he tell dem how de weather change and El Nino not coming anymore but dem got to get pumps.
He put out a tender fun $800 million in pump because he claim how a lot of pumping got to be done. Dem boys seh that he got experience in pumping because he hand start fuh feel de squeeze.
He get in de order fuh de pump but Uncle Donald suspect something and move he. Is suh Leslie tek over. And after Rob Earth move de whole pump business nearly fall through because Word Smith didn’t know what to do, only to collect.
Is a big confusion fuh get de pump and now to please de people de Word Smith now talking bout penalty and penalizing.
Who dem gun penalize? Certainly not de people who providing de pump because dem seh that after Rob Earth move dem had to change de specification fuh suit and fit Leslie. Is nuff confusion.
And is de same confusion at Hen See Hen. That company seh that de old Guana who like young leaf not wukking deh.
He wukking wid Geenah. Dem boys want to know if Geenah didn’t have enough wuk to keep one old Guana busy. That is why de opposition cut de budget.
Dem boys seh that de opposition couldn’t give Geenah money to let de old Guana trouble young girls.
Anyhow, dem have an investigation and de man still got de nerve to go to wuk like if nutten ain’t happen. De truth is that he wife is a terror and he can’t stay home like Martin who ain’t got nutten nowadays.
Talk half and wait fuh de pumping competition.