Dem boys seh…Hen See Hen old Guana sink he teeth pun young leaf
Dem have a saying that old iguana like young leaf. Well a old Guana at Hen See Hen in hot water and is not de first time. Dem boys get de news that he pick a young leaf that been doing work study in de same Hen See Hen.
De story claim that de old Guana use tricks fuh get de young leaf and now de police checking pun de tricks. He begging because dem got some seasoned Guana in Lot 12 waiting fuh eat he leaf when he come in. He gun find out that dem in Lot 12 don’t use de trick he use. Is rough when dem dealing wid people.
De hospital done check de young leaf and while dem boys seh that de father trying fuh cover down de situation, boat done gone a falls.
But dem have one place that trying fuh tun back he boat. Caribbean Temptations looking fuh cooks, fuh dispatchers who gun carry out de food and dem want bouncers. When dem boys hear, dem think was fast bowlers. Is when dem see Irfaat at de place dem understand wha dem really looking for. Dem want man wid size.
Brazzy in de runnings because he got de size. A lawyer name Randy Skirt On in de running. Shaatie put in he application but de people at de restaurant seh that while he got de size, he too short. A man recommend de Lunch Man but he got a bad foot suh he can’t qualify.
Nigel Huge mek de grade because he got size but Khemraj ain’t got nutten. Uncle Donald done announce that he too old fuh any bouncing.
And why dem want bouncers? Fuh people like de old Hen See Hen Guana who can’t see young meat.
Talk half and wait fuh story from Hen See Hen.