Dem boys seh…Is tiefin’ and more tiefin’
Dem boys seh de big man must be suffering from stitches in de side because of all de laughing he doing. When he look all over de world and see all dem things people does do, he does gat to chuckle. Is when he look down pun Guyana, then he does get a hearty laugh.
People in this country tiefing like when dey ent got no jail. Is tiefin’ and more tiefin’.
Imagine yuh hire man fuh build yuh house. He mess it up. Then yuh tek de same man and ask he fuh buy yuh a car in Japan. He tek three years fuh deliver de car. Then yuh turn around and ask he fuh build a big office. Is either yuh stupidy or dotish or like fuh lose money. Dem boys seh is something like dat happening with a company dat getting all dem special contract. And dem believe de big man upstairs laughing because dem Bees tek deh eyes and pass de people and dem hand deh deep in de doo-doo.
And he also must be laughing at de man from East Coast who tell de world how de police thief he car deck. He get arrest fuh stealing some GT&T cable a few weeks back. Dey park he car in de police station. He claim he lose he deck den and get even de Waterfalls newspaper to write about the matter.
Is den de story get real sweet. Somebody tief a car worth over $3M. Dem police start looking, and dem find de car, strip to the frame, in de man bottom-house. Dem hold on pun he. De policemen dem smiling. Dem seh how de man tek he eyes and pass dem. Now dem gat plans fuh he.
Talk half and don’t tek yuh eyes and pass nobody!