Dem boys seh…Irfaat mek Uncle Donald head spin
Being President ain’t no easy thing for Uncle Donald. He got to try and please everybody, even people who he don’t like. He got to meet people every day from all over the world and play he smiling with dem till he jaw hurt. And then he got to put up with a set of crasses like Kwame, De Rat and de Bees.
Dem boys know Uncle Donald trying. He go in and he meet a lot of things wrang and he can’t send anybody home as he like. Is de same people dat he got to find out from is wha goin’ wrang so he could fix it, is dem doing de wrang.
De man announce that he going to New York to talk to the United Nations. He seh dat after dat he gun visit Peru fuh talk about more trade.
But when he read in the Waterfalls paper about de NIS, is den tings start fuh come out. De man get instant headache. He drink tablet whole day and den he decide he can’t tek it no more. He come back home and decide to send de Buckett girl to Peru instead because he frighten fuh lef de country wid dem chore.
But is like he run away from the jumbie and butt up wid de coffin. He decide he gun tek a chance and mek a quick dash to de GuyExpo, the big lime at Sophia, that Manny and now Irfaat does hold. Is when he hear how much Irfaat spend, not only he head start fuh spin, he belly start fuh gripe. When a couple of de pensioners come up to he and ask he if he gat money to put in de NIS, de man get cold sweat. De pensioners look at he and dey look at Irfaat and wonder wheh de rumbling noise coming from.
Is de same head spinnin’ and belly wuk Uncle Adam get. He travel till he sick. Fuh couple days now he gone to some place name Falklands wheh he tink gat plenty rum and beaches. De man lef since last week and land couple hours ago. He cut he hair just before he lef Guyana. By the time he reach wheh he going he got one high afro. De people had to look ‘bout four times at he passport fuh see if is he or not. De man ain’t even look like heself no more.
Up to now he ain’t get to do no wuk and send it back and de boss man wondering how much money he gun collect this month end.
Talk half and look out for Uncle Adam afro when he come back