Dem boys seh…De Rat and de Bishop in de same church
Do fuh do nah obeah. Old people always seh suh. Sometimes people does guh wheh ain’t concern dem and when dem see things that don’t belong to dem trouble does start because dem does pick up and use like if is dem own without leave or licence.
De Rat don’t like go to church because one of he Minister seh that de best thing fuh do outside of being a President is to be a church leader. This man come from nowhere and tun Bishop and because of how he does tek de people money and put it to he own use, de Rat mek he a Minister.
Wid all de spare time pun he hand de Rat decide to visit de church to see if he can find out how de Bishop doing because when de same Bishop get de wuk in de Finance section he start fuh act li’l Edgy till dem call he a name like Edge something.
De Rat see a room in he Bishop friend church and he go inside and pull de blind. From he small days he use to do confession but now that he get big, if he start de confession, de priest gun dead and bury before he de Rat done list he sins.
But he like de room. It had perks. It had Grey Goose, which he don’t drink, but it had some of de most expensive wine. It had Moulin Rouge, Sauvignon, and it had Moet Blanc and Moet Rouge, things that de ordinary man can’t even pronounce.
Is wine like that mek he get Brazzy to open a wine bar in de city. Is suh de Rat sit down and smiling and sipping de wine.
When de Bishop walk in de Rat tell he how he got class and how he does treat all he sinners good. He want fuh know wha dem sinners does bring because he claim that when dem Bees and Irfaat sin he does mek dem give he a share of wha dem collect. He claim how he name spoil and it can’t spoil more than it spoil already.
De Bishop watch he and tell he that is only a fool ain’t gun mek heights when money deh round.
De Rat ask he wha de wine doing deh, and if de Bishop want run off Brazzy. That is when de Bishop tell he that just like how de Rat collect all de money even wha people ain’t give he, is suh he collect de wine and he put dem pun he side of de room.
Suh de Rat ask, “You mean I deh pun de wrang side?”
De Bishop tell he that he born pun de wrang side and now he sitting down pun de wrang side.
Talk half and don’t confess