Dem boys seh…Uncle Donald doing nuff wriggling
Sometimes people does dig hole fuh other people fall in. Uncle Donald didn’t know that dem had so much hole till he try fuh walk. One big hole was dem pirate textbooks. Fuh years, Shaik listen to Bharrat Ramroop and thief people book and reprint dem.
Poor Uncle Donald end up wid de problem. Wha is one man luck is poison fuh another. From de time Bharrat people decide that dem gun thief more people book Uncle Donald agree. But eh luck wasn’t Bharrat luck. De British put de clamp pun he. De poor man got to wriggle out.
Well dem boys seh that he got more to wriggle from. This time he promise to review de thiefing. De pirate book is only one.
When he done deal wid de pirate books he got to deal wid de pirating of state property fuh personal use. Nuff of dem tek state property. One former Minister driving a Prado. When was de elections he hide de vehicle under he house. One of dem thief a house.
Uncle Donald also got to deal wid pirate drugs. He got to wait till some foreign official come again and threaten de whole government while Barbie Jagdeo gun keep pushing more drugs pun de poor people of de country,
Fuh years Guyana been pirating everything from music to video to clothes. But that is minor to people like Brazzy who hire a pirate fuh a contractor pun de Amaila Road project. De pirate come wid little or nutten and lef wid millions of dollars.
Dem boys seh that Uncle Donald got to deal wid that. He got to deal wid all dem other pirates. Since he can’t send dem to jail he might have to send dem to Bharrat Ramroop.
Talk half and protect Guyana from dem pirates