Dem boys seh…Dem shoulda bun Henry
Henry de Yellow gone to rest, at least, but if some people get dem way he would be tossing and turning wherever he deh right now. Dem boys seh that de last few months of he life wasn’t really pleasant. When de man mother dead he end up in hospital and couldn’t go to she funeral. Some people claim that he mother didn’t want he at de funeral.
And dem didn’t even bury de man close to he mother and of course, people talk. Dem claim how he mother didn’t want he near she. Dem boys seh that dem shoulda bun Henry. He mighta tek li’l long but people had de time.
But dem boys know that whatever happen dem gun have a new police force wherever he going. Laurie go just before he. And couple morning before was Henry Fraser. Lloyd Barker go before all of dem suh dem have a core of police commissioners in that place.
People didn’t talk nice things bout some of dem because dem claim that all of dem do some wrang things. Henry get he share of cussing too. De Embassy people claim how he dabble wid drug dealers but Bharrat didn’t listen to dem because he seh that dem don’t put rice pun he plate. People want seh how Bharrat corrupt Henry, but of de dead, speak no ill. Everybody talk good bout Henry at he funeral.
But some people didn’t talk good bout some of dem who claim that dem got a right fuh represent Guyana at de Miss Universe pageant. Nuff people shame and de real Miss Universe who come fuh de pageant just shake she head and sometimes she bend she head fuh hide de laugh.
Dem boys see some stretch marks pun some of dem back and dem behind. De contest declare that de contestants must have clean skin. Some of dem skin look like de map of Guyana wid all de rivers. Was a night fuh mek people shame but de contestants only smiling. Kwame woulda mek a better Miss Universe.
Talk half and don’t wish Henry nuff speed to wheh he going—Heaven or hell .