Dem boys seh…Who de hell you think you is?
De people of any country is de boss and de government must know that. Imagine a minister go to a meeting at Kwakwani wid de people and he talk like if he is dem daddy. One man get vex and tell de minister, “Your eyes pass people. Who de hell you think you is?”
De man walk out from de meeting and everybody follow him. De meeting bruck up. Dem boys seh that de minister mouth get small because he feel like cent ice.
When he go to Kwakwani he walk wid more power than Donald. And dem boys seh that he get that attitude from de Rat who still believe that he is de most powerful man in Guyana. Dem boys seh that is only time wid he.
When that man talk to de minister everybody seh that is de spirit that people got to develop in de country to send a clear message to de leader who believe that dem is power.
Is not that dem boys encouraging lawlessness but people in position must know how to talk and treat de people. De people of this country should not allow anybody to talk down to dem.
Imagine when a reporter ask Bharrat Ramroop bout he palace he tell de reporter that he nah seh nutten but when he come home he gun talk. Well dem boys waiting and dem waiting patiently fuh hear because dem got nuff thing fuh talk.
And dem plan fuh talk piece by piece, li’l bit by li’l bit. When dem done wid he he gun pull out every hair on he bee, if he got. If not he got to pull from dem other Bees, not forgetting de one and only Brazzy. He too big to miss.
Dem boys want remind Donald, quietly, that dem got people in he Cabinet who still thiefing.
Talk half and teach some leaders manners.