Dem boys seh…Is lie pun lie all around
When people want fuh lie dem must hide de evidence. De waterfalls paper been in Moleson Creek and see a school yard full of bush. When dem print de photo nuff people vex. De next thing dem do to cover up is to tell de whole country that de school shut down because dem only got two children in de area.
Nutten don’t get Guyanese vex like when people tell dem that dem don’t have children. De people bring out de children. Dem boys seh that de people claim how dem only got two children in de area and de people produce 14. Well if dem been seh one de people woulda produce 28.
Now de people want to know wha is de next lie. Dem already hear nuff. Dem hear when Rob-Earth claim how he sell he house at Eccles for $100 million when in truth he transfer he house to Colin.
Irfaat claim how he family sub and give he money fuh one house which is all he got. De man got four house all over de country. Bharrat claim how he sell a house fuh $120 million when de house didn’t even worth $40 million. And he expect people fuh believe that. Well dem boys want to know how much this one cost. Some people believe that it ain’t cost nutten. And of course dem gun believe it ain’t cost de man nutten especially wid all wha come in wid container and wha de Bees help he wid.
Is lie all around. De fire service claim how somebody go to burn down de court. But dem boys seh that in town these days fire does start just so. If a man watch a building too hard it does bun down. And people believe that.
Talk half and lie bout de rest.