Dem boys seh…Uncle Donald system like a porous cast net
Uncle Donald mek nuff people get vex. Some of dem want fuh know if he blind. Some want fuh know if he only talking fuh talk sake. Dem boys talk bout corruption and he seh that he been dealing wid it fuh 20 years.
He seh that since 1992 de party was putting system in place fuh deal wid corruption. De system didn’t include de Rat who put system in place fuh thief. Dem boys seh that wha Uncle Donald was actually doing was to mek sure that dem didn’t thief from de party. But de Rat had more sense than that. He tackle de Treasury.
Uncle Donald only talk because a contractor come out and call name. When de name meet Uncle Donald he claim how de man wasn’t a party man. Now Uncle Donald is government and party. He got to remove all dem system that Jagdeo had in place because all dem system allow people fuh thief and thief big.
Fuh sure, if Uncle Donald system was a cast net it had big hole because all who thief slip through. Nobody ain’t getting ketch. Brazzy had NICIL and de money disappear. Dem boys seh that it look like if Brazzy and all disappear. Uncle Donald system shoulda ketch he because he too big fuh pass through any hole.
But some people seh that Uncle Donald only talking because he got mouth. He seh that he know that dem engineer and dem contractor got runnings. Uncle Donald seh that he know that. Wha he do since he get in office?
Dem got two retire people who deh pun de tender board, Roopchand and Balgobin and dem two been there since he was putting de system in place fuh de party to cut out corruption. Dem got DeClou who declining everything. He even decline people tekking he and he friends photograph. He and all decline Uncle Donald system.
Everything start and stop at you fingernail, Uncle Donald. Move you hand, Uncle Donald.
Talk half and clean out de other half.