Dem Boys Seh…Tight fist could mek yuh lose contract
Dem boys always sayin’ dat one day somebody gun get vex and start talk out all de dutty story, because it hard fuh so much runnins going on and something ent go wrong…Well dat day was yesterday.
A kantractor seh dat dem Ministry people eyes pass he fuh close off he contract, so he decide dat he gun leh everybody know wha going on.
De man seh he do nuff wuk fuh guvment and was no problem, but is when he get de contract fuh broaden de road wha’ run ‘longside de seawall, is den when all de trouble start, everybody eye suddenly get red.
De contract was fuh nearly five hundred million. De man seh everytime he walk in de two ministry wheh he had fuh sign de paper dem, people wha he never know suddenly tellin’ he good morning and good afternoon. He seh he know all dat look lil funny, but is when one man call he one side and whisper in he ears ‘bout four percent of de big money, and another man ask he fuh a minibus, and a engineer ask he fuh pay fuh he wedding, is den he realize why everybody smiling broad wid he.
He seh he ask de four percent man if is mad he mad, and dat man go and report back to de ‘Big Man’ how de kantractor got tight fist.
De ‘Big Man’ get suh vex he stop payment and done wid de kantractor right away. He get some people fuh seh dat all de test wha de man engineer do pun de road is bogus.
Well dem boys hear who is de ‘Big Man’, and dem boys ent surprise. Is all ah dem eye does full when big money involve. If yuh want fuh know is who is de ‘Big Man’ when yuh drivin pass de Waterfalls Paper in a minibus just holla out a name from through de window, and dem boys gun whistle.
And talkin’ bout whistle, everytime labba lip Kwame pass by Camp Street, a whole set ah whistle comin’ from inside from dem ‘Big Man’. He cuttin’ up he eye pun dem, but wha’ miss yuh doan pass yuh. Anyhow Kwame due fuh ah extension.
Talk half and watch out for dem four percent man!