Dem boys seh…All dem hustlers learn from De Rat
Life is about a hustle. And dem boys ain’t talking ‘bout hustling woman. You got to have your head pun yuh shoulder all de time because de road ain’t easy. They gat hustlers all over the world.
In America, people like Madoff and Stanford get lost away for big-time hustle. Dem stupid. Dem get ketch.
In Guyana, dey gat nuff hustlers too. Most of dem don’t get ketch. Dem too smart and dey got serious backin’. Fifty percent of dem become politicians and de odder 50% kantractors. Yuh can’t go wrang deh at all!
Yesterday, de papers talk ‘bout a security guard who fall sick and tek a big lash. Imagine yuh can be so sick and gat plenty money and can’t go to de doctor, but yuh gat a whole million to pay yuh matty guard fuh try and cure yuh sick by doing a obeah wuk.
Imagine de woman ain’t get cure de fuss time. She ain’t get cure de second time. She keep paying till she eventually realize she getting con. She call de police. De police an all did wan laff when dem hear de story.
Dem boys seh dat de police shoulda really charge de one who pay the money because she stupidee.
But is de kantractors and politicians dat really tek de cake when yuh talking about hustlers. Dem gat dey own mighty hustle going on. It sophisticated to de highest and even de courts in Guyana can’t deal wid it. De hustle set up so sweet that the money does rotate from de guvment to de kantractors and into dem Bees pocket.
Dem set up nuff company and put dem friend and family fuh run dem and den arrange fuh de company dem get nuff contract. Is billions dey tiefin’. If dat is not international hustle den dem boys ain’t know nuttin ‘bout hustle.
Dem boys know de house of cards crashing down one by one.
And dem protestors too know how fuh hustle. As soon as Sam Blinds talk ‘bout increase in electricity rates fuh dat town, dem decide fuh do a quick hustle.
De electricity place bun down. De reasoning is simple. No electricity building…no bills. Dem smart. Dey learn dat hustle from De Rat and all dem Bees.
Talk half and hustle out de odder half.