Dem boys seh…Everybody want to be Baby Burnham
Everybody want lead de PNC. And is funny how de whole country sit down and wait fuh see who gun end up de leader. Corbin cause de problem. He sit down and mek people believe that dem had to train like how people does train fuh de Olympics.
David and Carl decide that dem want follow in Burnham footsteps. De party people mek a decision and de winner now calling heself Baby Burnham.
De thing is Baby Jesus who did really believe that he was de young Burnham gone to de AFC when he got to think bout Moses and Prakash because de other young Burnham is de Speaker of de National Assembly.
But de only person who ain’t care is Uncle Donald. He got a problem wid Linden. As fast as de security people clear de bridge de local people blocking it. Dem had a policeman operating de bulldozer and he bruck up de Linden bridge. Robeson get vex because he seh that he is de only person who should bruck up anything.
Anyhow, de Linden people show that Guyanese strong and more of dem shoulda tek up weightlifting. Dem people lift some wood that woulda mek a bulldozer back down.
Dem people not only lift de wood; dem fetch some log over some distance. Even Uncle Donald don’t know wheh de wood come from. He thought that all de log been in de forest or that de Chinee did export all wha cut.
That is why he listening to he advisor and believing that dem Chinee people at de bauxite company helping de protest. Dem left back some of de timber fuh block de road. That is wha Uncle Donald seh.
But he worrying bout something else. He want to know how dem Linden people feeding demself when dem complain that dem didn’t have money to start wid. He seh that if dem can protest fuh another week he gun raise de subsidy from wha he did propose because if dem can protest then dem can pay.
Talk half. Lef half.