Dem boys seh…Uncle Adam barely get pampers
Some people does deh good till dem bite off more than they could chew. Whole year dey does strong and healthy and mekkin laugh ‘bout people till de people dem start fuh cry.
Dey mek laugh ‘bout de government, dey mek laugh ‘bout de opposition, dey even mek laugh bout de man wha’ does pay dem. But dem boys know that old people does always got dem saying wha does never wrang. Old people seh wheh laugh deh nuff cry deh.
Well Uncle Adam laugh people so much till he belly loosen. He try fuh come out he house, but he pants couldn’t hold in everything, suh he turn back. He thought was wind, but dem boys know was de real thing. All he family gone away to foreign, only two leff in GT, but dem deh in de bush. So he ent had nobody fuh send fuh pampers. He start fuh cry hard, hard. Two girls from de Waterfalls paper had fuh carry a pack of Cheekies fuh he. If yuh hear thanks. He even ask fuh a hug up.
De big man cry fuh so, but water ain’t only coming from he eye, it coming through all dem holes pon he body. God mek he special.
He went out Saturday night to a big function and drink de likka like if it would never ever touch Guyana shores again. De man drink rum, crème liqueur, alize, tequila, de whole works. Dey even give he kero like Uncle Sam and he ent even realize. Then de man eat fuh glutten.
Well dem boys know wha sweet a goat mouth a sour at de back end. When time come fuh pass it out was worries, he tun de loose goose.
In he car, pon he floor, everywhere he walk was sheer water. And don’t talk ‘bout de smell, he neighbour dem complaining till now.
Talking ‘bout water. Bridge mek fuh get people across water but in Guyana dem kantractor does mek bridge that water does cross over.
De bridge wha deh fuh 34 years fall into de Demerara River. Some people try crossing with minibus and when dem reach halfway pun de fuss part dey realize dat de bridge deh more low than normal, and bus ain’t gat outboard engine. If you see confusion. Even de bus man run and lef he bus with all dem passenger inside.
Is like how dem boys hear how dem Chinee want run… de country. Dem mek de government borrowing millions fuh build over a airport that nobody gun come to and dem can’t get money fuh build a proppa bridge wha de people need. Dem boys seh Uncle Donald bess study he head or everything gun float away from we.
Talk half and de water gun do de rest.