Dem boys seh … Government people avoiding Linden
All over de world when police shoot without reason dem does get charge wid murder. Jamaica wha got more killing than Guyana doesn’t mek joke wid dem police who step out a line. But dem in Guyana different.
Dem thiefing, dem selling drugs, dem robbing people and dem shooting protestors. De officer who does tek bribe get instant promotion. Dem boys seh that he prove that he qualify fuh be among the leaders in Guyana because he corrupt. He was de officer who demand that a man who been in de bush bring out gold like if is he put de gold in de ground.
He guh to Linden and de people welcome he not knowing that is like welcoming wood ants. Three people dead and he ain’t even go to de mortuary to see who dead. De police PRO had to check wid de newspapers.
Rohee keep quiet because he know that de people at de Waterfalls paper waiting fuh he open he mouth and talk more stupidness.
Dem boys notice that none of dem government people gone to Linden. Normally, since you miss dem, dem does drive up. If was a road accident de whole Cabinet woulda deh in Linden. None of dem ain’t gone yet, not Odinga, not Gail, not Sam.
None of dem ain’t even announce that dem mekking a contribution fuh de wake fuh dem who dem secret agent kill. And Rohee smart; he move de man before de people move he.
Dem boys ain’t happy. And dem still support de budget fuh Gee Nah because dem see how Gee Nah does lie and how de Chronicle does follow it like blind Bartimus; like monkey see, monkey do. How de PPP headquarters bun down.
Talk half and wait fuh de other half.