Dem boys seh…Nuff people born wid glue

When you like something you does do anything and everything to get it. For example when a man like sex he does encourage and support women. Women does do de same thing—vice versa.
When a man like thief he does encourage and support thiefing. Dem got nuff example that dem boys can use but fuh now dem only using one. This one happen yesterday.
De police buy a boat. De man who sell de boat was married to one of de Rat family. De police seh suh, not dem boys. Always when dem got more than one person fuh get a drawback from de deal dem does always got distrust and de whole story does come to light. It does buss out.
Is that wha land dem senior police in trouble. One of dem get more money than what dem actually pay fuh de boat. De other two stuups dem mouth and start grumble. And that is how de story come out.
Cement Roti start de investigation but before get anyway Ohh Pee tek over. When de Rat hear is he family involve he try fuh save he face. He beg all of dem who tek de drawback fuh pay back de money suh that he family name can’t call in corrupt dealings.
Little do he know that he whole generation born wid glue all over dem body, not only dun dem hand. De glue ketch pun he friends, other relatives and de Bees, not forgetting Brazzy. De whole glue pot rub off pun he.  Bruh Mill got to find de solution that could wash away de Ever Stick wha stick pun some of dem rank wha he got.
Talk half and watch de glue from de other half.