Dem Boys seh… Kickback got kick up
De Waterfalls paper use to talk bout kickback a lang time now but nobody ever tek notice. De paper even call names, identify people including all de Bees, especially de King Bee.
De police sit down and watch till dem learn. Dem see how de King Bee operate and dem know that once he involve then nobody gun get in trouble. Was all hell break loose.
Dem tek kickback from de poor innocent people dem use to kick up. Dem tek kickback from Tom, Dick and Harry.
Dem move to bigger things because dem realize that that was small change when dem boys start exposing dem hundreds of millions of koker and dem other contracts.
Dem couldn’t get in that type of action suh dem start dem own auction.
Dem start selling out people animals from dem pound; dem start sell bicycle, jewellery and things sitting as exhibits; dem sell out de cocaine and marijuana then switch de exhibits wid grass and flour.
Then dem start fuh sell police property. Dem sell building that nobody didn’t know about. Same way Bharrat Ramroop, through Brazzy, sell out three-quarter of Guyana to Eddie, Babbie, Gerry, Mannie and de rest of dem.
But dem police get ketch and dem always gun get ketch because dem like beat people. Bharrat Ramroop and de clique does rob people blind and watch dem in dem face next day like if cow buss rope. Dem was brazen but is only time wid dem. That is wha dem boys seh.
Dem boys want tell de King Rat and he Bees and all dem police wha like thief that you can run from man, but God don’t tek lef.
Talk half and worry ‘bout de other half.