Dem boys seh…Dem police learn from Bharrat Ramroop
Two private company offering two first class ticket fuh de rest of de cricket match between West Indies and New Zealand. Dem also offering free hotel and meals plus drinks fuh a week in de country wheh de cricket playing. Anybody can win de prize but dem have to answer a quiz.
When dem boys hear de announcement dem decide that dem gun send in nuff entry. De question is ‘Nuff company, including Bee Kay and Babbie, sponsoring de cricket in Guyana pun Hen See Hen. Who name dem must mek out de cheque in? Martin Goolsarran, Fuzzy Sattaur or Hen See Hen?’ Send in you answer to Bharrat Ramroop in care of Santa Complex.
Bruh Mill did give de whole force a chance fuh tun in dem badge. He guh to wuk early Monday morning and stand up wid two truck waiting fuh collect de badges.
Dem boys seh that he know de force got plenty corrupt police. One very senior man tun up and tell he that is de whole force and dem beg he not fuh collect dem badge because dem gun change, that dem gun tun from dem corrupt ways.
Dem seh that Jagdeo shoulda been wid dem police de same time when dem plan fuh change.
But fuh sure some of dem gun go home. Dem can’t born again. Dem sell all de vehicle to dem friends and pay in next to nutten to de government and pocket de hag of de money.
Bruh Mill seh that dem is not corrupt; dem behave bigger and more powerful than Jagdeo. Dem had to learn from Jagdeo. Bruh Mill seh that he guh deal wid dem.
Dem boys want tell Uncle Donald that if he bax back de records he gun see wuss than wha dem police do at that auction. He guh see some brand new vehicle show that it sell fuh next to nutten although de bidding price was very high.
De same does go lang at de Deeds registry when dem got auction there. Nuff property does give way under de table. And not under de court table.
Dem boys seh that is all about surviving. One man seh that he survive going to school barefoot; one seh that he survive beggin fuh a cent fuh get a taste of sugar cake.
One man survive walking miles fuh got to school. Another one seh that he survive when de boat tun over in de Corentyne River.
Wha dem boys want is fuh God to mek dem survive fuh see Chinee get rob wid de money dem plan fuh thief from Guyana fuh de hydro seed and de hydro port.
Talk half and hope we survive fuh de other half.