Dem boys seh… Benn mek iron float
De Bible talk bout seed. It seh that de seed you sow is that you does reap. Some people misinterpret that saying. Dem want sow bora and reap pumpkin.
Politicians know bout that good. Rob Earth did once give dem farmers a pepper tree and two seed. Dem man wha get de seed tell dem boys last night that de tree dead and de seed never buss. That was all part of de grow more food campaign. De man planning to go to Sammy.
Rob Earth mess up de agri sector. Now he gone in de mining sector but that don’t wuk wid seed. That sector got men who got real seed. Dem does plant gold and get diamond. Yesterday dem miners had a meeting wid he Rob Earth and he tell dem fuh tek two spade and one bucket and plant grass. One of de miner ask he fuh get wha? Yuh ra**.
Right away dem call fuh get rid of he from de mining district. Is not he alone people want get rid of. Dem got dem eye pun Benn because he Benn can’t sign he own name and yet he tell people how he sign de airport US$150 million deal.
He couldn’t sign fuh when Bee Kay hand over de kack stelling. He seh up to now he nah get de stelling officially yet. Dem boys seh that de official handing over was yesterday. De two-page ad seh suh.
When Benn and he entourage tun up wid de boat and de ramp come fuh he step out de five-ton ramp break off and fall in de river. It nearly tek off Benn li’l toe pun he right hand. That is wha a stroke victim at de hospital tell dem boys.
Dem float up de ramp today and a new ceremony is to be held shortly.
Talk half and wait fuh when de stelling gun fall down next time.