Dem boys seh… Chronicle seh sorry and de police seh resign
Old people does seh that sorry mek li’l boy mash big man toe. De Chronicle carry some editorial that mek de whole country vex. At first people didn’t seh nutten and de Chronicle didn’t seh nutten too. But as soon as de WPA tell people not to buy de paper up comes Keith de Burrower and seh sorry.
People wasn’t buying de paper anyhow suh fuh tell people not to buy de paper is like telling a duck not to swim. But dem boys seh that de WPA also sending confusing messages. It complaining how de government ain’t finding jobs fuh people.
When it tell people fuh boycott de paper then it putting people out of job. Is wha it mean? Is wha it want?
De other day dem had a soldier graduation at de Cultural Centre. Uncle Donald decide that he gun be present and he hand over de awards. Out of de blue Dr Berry and Benn tun up. Dem boys seh that dem always want to be soldier.
But all two of dem got left foot so when dem get de command to tun left it woulda been a mess.
That ain’t de only strange thing. De police had a march. Dem look good and everybody happy. Since de march done de Commissioner put a cussing pun dem same people . Peeping Atom did write bout corruption and he tell de world that de first place got to clean up is de police force.
Well de Commissioner tell he men that all who corrupt must resign now. Well dem boys seh that de whole force gun have to resign because all of dem does deh tekking bribe. People does guh fuh a favour from a policeman and when de policeman grant he a favour he does lef a small piece.
Dem have some who does just stop people fuh a raise. But that is not de problem. Is when de very police who can’t explain wha happen to de money wha dem get fuh elections then dem have problems. And is de big ones who telling people fuh resign who involve in that.
Talk half and wait fuh de fall out