Dem boys seh…De Waterfalls paper got proposal just like dem Chinee
Is not everybody believe in thiefing and corruption. Cheddi was one and he teach all of dem in he party fuh be clean. Today that principle dead just like Cheddi.
Tek Jagdeo. He accept a Chinee proposal that cost US$150 million without any question fuh build a US$20 million airport. De Chinee people seh that dem got nuff more proposal fuh give dem. Dem got proposal fuh build bridge, railway, deep water harbour and even clothes line.
Seeing that de government like fuh tek proposal dem boys at de Waterfalls paper got a proposal fuh build a bridge across from Hog Island to Wakenaam.
Just like de Chinee who give a flimsy excuse fuh de airport dem boys excuse fuh de bridge is fuh dem cow who deh pun Hog Island fuh walk across to Wakenaam when de grass run out pun Hog Island. That project is fuh only US$500 million. That is a solid reason and dem boys hope that Donald jump pun this one quickly.
Dem boys seh that Uncle Ralph was in de thick of things. He did seeing, hearing and even smelling all what did going on. Like de song he holler, “Lawd Ah can’t tek it no more.”
De thing start fuh prick he conscience and tickle he brain. He tek out he pen and paper and write to Uncle Donald.
“Dear Uncle Donald, I can’t tek it no more. Me did expect you fuh get rid of some of Jagdeo people—Rob Earth, Irfaat, Shaatie and Brazzy. You nah do that and de boat keep sailing in de same direction. It look like if you only seh you wearing de pants but Jagdeo pulling de strings. Because of this me got to seh goodbye, Donald and de PPP.”
Dem boys seh that de letter was just like de one wha Yog send to GT&T fuh seh Goodbye. Same thing wha Ralph seh he can’t tek dem thief no more in de PPP Yog seh that he can’t tek dem in GT&T.
Dem boys now hear late last night through de grapevine that Uncle Donald planning fuh seh goodbye too. But he nah know who fuh seh goodbye to.
He come from de same old school like Ralph and he can’t tek dem Kavakamites who deh round he, but he can’t kick dem out suh soon. It gun tek time and that is wha Ralph nah got on he side.
Talk half and seh goodbye to de other half.