Dem boys seh…Dem thiefing people gun holler
Old people got a saying, ‘Everyday bucket go a well one day it bottom gun lef’. Dem boys seh that that old people saying ain’t apply to some of dem in de government. Dem going to de well, which is de treasury, everyday, and de bottom can’t fall out yet.
It got to be that de bottom mek out of reinforced steel or de well got something that preventing de bottom from falling out. But only in Guyana. Cathy from de AFC mek a statement bout how GRA does only try fuh pull out de bottom from people who ain’t deh in de government and right away Khurshid holler how she wrong.
Well dem boys want he show dem who bottom he pull out. In Romania, dem investigate a man and find out that he did like going to de well. Dem jail he and de man do de honourable thing. He kill heself. If that has to happen in Guyana dem funeral parlour wouldn’t have space fuh de bodies that gun pile up.
Now if dem people who like thief from de treasury was honourable dem woulda save de nation and let demself go astray. Dem boys seh that in any case nuff of dem done gone astray from de straight and narrow. Dem never learn to be decent . Now dem deh in de category of ‘Dawg custom to suck egg, can’t stop’.
But dem same old people seh that dem got a cure. All dem got to do is put a hot egg in de dawg mouth. That is wha de Waterfalls boss man seh that he doing. When de egg bun de dawg it does holler. Couple of dem in de racket business start holler already.
Dem run to the court hollering. De Waterfalls paper seh that dem ain’t holler enough. Dem gun really holler when Uncle Sam put he hand pun dem.
Talk half and wait fuh de real hollering.