Dem boys seh…Bharrat Ramroop strikes again
Guyana really corrupt. Dem boys seh corruption reach alarming proportions. It is now widespread. It suh widespread that when you talk people running to de court fuh shut you up.
De whole country now tun a circus—a thiefing circus. De circus got a ringmaster and he name Bubbie Jagdeo. He got nuff clown. De biggest one is Bharrat Ramroop. The rest of dem is de acrobats and de best of dem is Brazzy. He is also de biggest. Dem boys imagine what he look like in he two-piece dutty bathing suit.
Some of de duttiness coming to de front. Dem nastiness coming to light one by one. Dem boys know all gun come out, sooner rather than later. And that is wha some of dem frighten. Don’t be surprised dem boys gun get a ton of lawsuits trying to stop dem from talking.
Dem get one lawsuit de other day and before dem coulda find a lawyer another one come. Dem boys expect one more today and couple more fuh de rest of de month.
Dem boys want dem fuh know that dem got belly, decency, and honesty that dem can handle de lawsuit by de hour. Nutten gun stop dem from informing de nation what dem kava ca mites do to de people and de country.
Dem boys plan fuh keep dem busy fuh de rest of dem life because dem mustn’t enjoy wha dem thief. Dem boys know that dem uncomfortable, that dem don’t sleep in de night and mess all day. De Protector is no more. He losing he grip from de Treasury while he kava ca mites losing dem mind.
Dem running helter skelter. One of dem holla when he hear bout Allen Stanford, de big one who get 110 years in jail, in Uncle Sam. Uncle Sam don’t mek joke and dem boys hear that some of dem stop travel. One of de Bees stop going to America. He hear that de FBI got de pumpkin jumpsuit at de airport waiting fuh he.
Talk half and watch out fuh de other half.