Dem boys seh…Is Independence and thiefing ain’t done

Is another Independence anniversary but this time if a foreigner was to walk in de city he woulda never know it. Dem had no decoration and except fuh dem people who was cleaning de trench, was just like another day.
But in de preparation dem had couple things that remind people.  Dem boys was sitting at de corner when dem see couple dog running liker if tiger deh behind dem. Then dem hear de boom. Was de army practising fuh de Independence fireworks. De next night before de real fireworks was de same thing.
When dem boys pass by de NICIL building dem see a head shaking up and down and a man talking, “One million, two million, three million…” Was Brazzy counting how much money lef. De rest done share out. Dem boys she that is why dem postpone Parliament because nobody ain’t want to answer question.
But thiefing ain’t done. Some people thief a big thing like a pontoon from de Harbour Bridge. Dem boys want to know how nobody ain’t see when de pontoon was floating away. People deh at both ends of de bridge and car passing all de time.
When de pontoon sail out of de river even de lighthouse ain’t notice nutten. Dem boys seh that de people who thief it planning to sell it to NICIL. Suh when Brazzy talking bout de NICIL assets he gun include one thiefing pontoon from de Harbour Bridge.
Thank heavens de Independence anniversary is only fuh one day because dem woulda thief out de whole Harbour Bridge.
Talk half and watch wha gun happen wid de other half