Dem boys seh…De debate show who is man and who is boy
De Waterfalls boss man been pun TV and tek on Brazzy and Shaatie. Was a debate ‘bout NICIL. De Waterfalls paper been exposing some things bout NICIL and nuff people wasn’t happy.
Dem boys know that some of de things was stretching things a bit, but if a man seeing things and he refusing to talk then people gun do more and more till he talk. Brazzy and Shaatie talk de other night. Dem seh that NICIL got money to spend and it spending it fuh mek money.
But even then dem keep back telling all de truth because dem didn’t tell de people that de government refuse to tek profit from de bridge toll and all dem private investors get dem money. Suh if NICIL invest then since it is government it can’t get money but that is only de truth. Brazzy and Shaatie telling people that NICIL is private and suh it getting money.
Is de same thing wid de Marriott. NICIL barely got $700 million but it coulda find $3.8 billion fuh invest in de hotel. Dem boys seh that it did done deposit de money and then it declare de $700 million.
Now everybody know that de government want get out of business. If that is de case why it investing in business? Is either it don’t want nutten to do wid business or it want to be a big businessman. That is de confusion that NICIL cause and dem boys want to know when it gun stop.
Is a pity that Prakash and Moses didn’t join in de action because dem woulda talk ‘bout wha dem know. Is that dem did frighten that Brazzy and Shaatie woulda rough dem up. Dem stay home and watch de programme and dem shame. Well dem boys seh that man nah tobacco stick and dem shoulda come forward.
And dem ain’t gun get a next chance.
Talk half and be brave anytime de next half come up.