Dem boys seh…Anil wrong again
People does try fuh hide dem faults and dem always got people fuh cover fuh dem. Tek de case of de manager who get rob. He staff see de action before de people attack but he didn’t see. De staff call he and before he could turn back de people attack.
Now when people try fuh find out he name is a secret. And when dem talk to de staff is another secret. But is de same thing wid de government people. Brazzy hold on pun de NICIL money and de nation feel that he should pay it into de Consolidated Fund.
Dem boys seh that de devil got a friend. Anil step in and decide that Brazzy right. And he tell de world that he talking as de chief lawmaker.
He is de same man who go to de courts fuh challenge dem parliamentarians and he lose. If dem parliamentarians right then how come dem wrong now.
If de Chief lawmaker think he right and all dem other people in de parliament seh that he wrong then dem boys want to know wha gun happen to de law.
That is not strange. A woman does defend she child whether he wrong or right but most of de time when he wrong. Anil behaving like dem mother. When dem boys ask he if Pradoville2 was a legitimate deal he didn’t seh nutten because he know that he woulda end up in trouble wid Jagdeo.
When dem boys ask if de Marriott was a good project he couldn’t seh nutten because Brazzy woulda report to Jagdeo and he woulda deh in more trouble.
But de story ain’t done. Dem same parliamentarians gun test it.
Talk half and wait fuh de backlash.