Dem boys seh…Brazzy shorts and Marcie T-back in trouble
When you entrusted wid people thing and you mess around wid it you does end up in court. If de police don’t charge you people does tek private action and sue you fuh everything, down to you draws and you bukta.
Brazzy don’t wear bukta because dem don’t mek fuh he size. He got to wear shorts and dem boys going fuh that too. But Marcie is a different story. Dem boys gun tek she T-back. But she deep inside de thing suh dem boys got fuh tek something off she.
Is she and Brazzy who conspire fuh control de poor people of this country money. Nuff lawsuit coming. Dem boys filing a special lawsuit pun de two of dem but not fuh money. Dem shoulda audit de account but dem just like Fuzzy and Knee Ass from NCN and GINA and Rum Atar from Chronicle.
Imagine dem had de nerve fuh guh pun de road and protest. Fuzzy wear he suit and Rum Atar had a Guinness in he had while Knee Ass had a gyal in he hand. Dem boys hope he wife don’t beat he again.
Dem thief out de money fuh spend pun rum, gyal and suit. That’s why dem can’t audit de account because dem gun end up in jail and who ain’t end up in jail gun end up in de pumpkin jumpsuit like wha dem measure Brazzy and Rob Bert for.
Rob Bert still got balls after he give dem farmers two seed and one plant, and thief all de rest of money and put in he pocket. That was when he was another minister. Now he got another job and still got de nerve fuh tell de nation through Rum Atar Chronicle that de budget cut affecting some farmers.
Dem boys want tell de nation de truth. De budget cuts nah really a hurt dem farmers. A matter of fact, is he who send dem fuh protest because de cuts cut out he pocket. That is wha he worried about.
Talk half and think about de other half.