Dem boys seh…Dem want oil but dem get water

Old people seh that nobody should count dem chicken before dem hatch. CGX start fuh drill fuh oil and Bharrat, Rob Bert, Brazzy, Bobby and everybody start fuh clap dem hand. You woulda believe that dem find oil from de way these people was behaving.
De posse announce how dem building de Marriott because when de oil come nuff people gun be coming to Guyana and de Marriott gun kick in. Well dem ain’t get oil. Well dem boys seh that dem ain’t even find hile. Bharrat and he friends and even Uncle Donald get water. De hile was fuh  Irfaat, Rob Bert, Brazzy and Bobby. And Uncle Donald follow he like a jackass. Was de same Uncle Donald who tell a political meeting that he had to be a jackass.
Dem boys seh that it look like he getting dotish. He get water and he don’t like it. He might get water under he heart if he continue to follow all of dem ol’ higue.
Dem can tek water if dem don’t get hile. Brazzy don’t need none of de two. He got to get lubricant. Is he mek dem people didn’t find hile. And dem blight demself when dem offer he wuk. That is why he lef de privatization unit.
De Waterfalls boss man come back from vacation and that was de news that greet he. He tell everybody that he know that Guyana woulda find oil but it get blight wid some of dem who use to lead and some who still deh round. Dem ol’ higue who sucking de blood of de people blight de country.
Dem boys seh that de Waterfalls boss man know how dem same people cockish and scampish. Is that cockishness and scampishness got CGX drilling fuh water and not oil.
And de Marriott? It look like if de Rat and he friends start counting too soon. Is a good thing dem ain’t start building yet.
Dem boys seh that dem better wait.
Talk half and watch fuh de other half.