Dem boys seh…Uncle Donald under pressure
Desmond Hoyte use to put pressure pun de government wid slow fyaah; moh fyaah. Some people in La Penitence decide fuh wake up de City Council and everybody wid de slow fyaah. Only tonight dem go straight to hot fyaah.
Dem have a bridge that get suh bad that it does throw car in de trench. Fuh this week it throw two car in de trench and all of dem tun over. People nearly dead. De people get really vex because dem know that since de first accident de council people shoulda fix it.
Dem decide fuh shut down de bridge and then dem apply de fire. Wasn’t slow fyaah. Police come and dem couldn’t stop de fyaah because dem know de people was angry and dem mighta set de police pun fyaah too.
And talking bout fyaah. Uncle Moses tell Uncle Donald that he shouldn’t play poker because he can’t bluff. Uncle Donald threaten to call snap elections. Right away Uncle Moses tell de whole country that Uncle Donald was a dead duck. Uncle Donald get vex because he know people does call he Donald Duck, but only behind he back.
And he only talking bout how de Opposition cut de budget. Dem boys seh that he lucky dem didn’t cut he Finance Minister tail fuh putting in things that shouldn’t be in de budget. And dem boys want to know why he encouraging Brazzy to hold on to de NICIL funds. Is more money than de opposition cut from de budget.
Why dem keeping that money pun de side? Dem boys seh that perhaps de money only deh in de account pun paper but it gone ever since. That is why dem talking how dem don’t have to put no money in de budget. Dem ain’t got no money fuh put.
Is de same thing wid de Lotto Funds. Dem boys want to know if it got any money. Dem see all de big house wha dem Ministers got and dem see de kind of pay some of de people get and dem know that de money couldn’t come from de treasury, that it had to come from another source.
People looking and de boys in de Cabinet telling Uncle Donald that he should call elections and win fuh stop all de questions because people gun go to jail. Uncle Donald thinking.
Talk half and bluff de other half