Dem boys seh…Cabinet cheap and de police force get wutless
Some people can really go to great lengths to show that things really bad. Dem had Cabinet meeting Wednesday. Dem boys know that every Cabinet meeting does got food and drinks. If is a short meeting is snacks and then a meal when it done.
If is a long meeting is two meal. When de budget cut dem boys expect that de meal woulda cut but dem didn’t know that de cut was suh deep. Wednesday was Cabinet meeting and de Cabinet serve water and wasn’t even bottle water. De water come from de pipe.
When Beri Beri ask why pipe water that can give people belly wuk, Uncle Donald tell he that is only one dollar Ohh Pee get in de budget and that he got to spend wha de dollar can buy. Gail ask he if he couldn’t buy some saltfish and she would mek de bake.
Jenny de West claim how chowmein more cheap and that she coulda boil some veggie chowmein. Irfaat couldn’t even bother because he and Clement lef de place and go to Kam Boat, a Chinee shop, and had a powerful meal of chicken fry rice wid a serving of roast pork.
And Fip laughing. He still vex wid Uncle Donald fuh tekking back de contract. He claim how if he still had de contract he coulda give dem some of de money to help dem out.
Ohh Pee ain’t de only place wheh things scarce. All dem Minister stop hold press conference. Dem use to provide a snack. That and all cut, but is not because dem budget cut. Is because dem realize that de less dem spend is de more dem got to thief. De thiefing scale back, because de opposition questioning everything.
And since Henry lef de police force a lot of things happening. Dem boys been to de Officers’ Mess de other night and dem had to call out de guard. Dem ketch a male Cadet Officer in a funny position wid a male recruit.
When Brumell ask dem why de slackness, dem claim how a law pass that allow such a thing. Brumell call de DPP who now calling Henry fuh resolve de issue. That is why de man get sick de other day. Brumell now telling everybody that de two men trying to prevent he appointment because is a shameful thing and people gun claim how it happen on he watch.
Talk half and pray fuh de rest.