Dem boys seh…Is joke dem mekking wik Hen See Hen
Who got luck eat pork. That is an old Chinee saying from de days when rat and pork mix up. De lucky person use to eat de pork and who eat de rat was de one who didn’t got luck. Some people lef Geena and Hen See Hen because dem couldn’t tek de direction fuh write only good things bout de government. Now dem laughing because de direction to dem who stay is not only to write but to picket pun de streets and to cry pun TV.
Dem boys talk to one of de workers who been crying and he tell dem that he only crying till he get pay. He seh that is de only wuk place wheh de big ones does get pay before everybody else. Now dem talking how budget cut. This man claim that he ain’t getting pay. But nobody ain’t gone pun de road.
When dem shut down Sharma dem didn’t care bout who been pun de road. When dem tek back dem ads dem didn’t care bout who been pun de road. And none of dem offer sympathy. Now dem want de same people fuh sympathise wid dem.
De other day two Minister travel in one car fuh show how things bad. But dem ain’t cut back pun de lights dem burning and pun de security dem got. Is only de Hen See Hen staff fooling people that dem got things bad. No Norway money ain’t come yet.
Uncle Donald done seh that fuh he one, one de Norway money gun stay right wheh it deh because fuh get it more hard that chewing brick. Is two years de government trying to get it and nutten happen. At one time he was wondering whether de Rat collect and was fooling de people but somebody write and tell he that nobody ain’t collect.
Dem boys seh that wha really causing problem is that nuff of dem can’t travel as dem please. If de budget didn’t cut dem would get money fuh airfare and other things. Travelling to overseas was like walking to de Gardens.
But some of dem shoulda glad because de people waiting fuh dem in de States. De pumpkin jump suit done press. De Americans done seh that is not in their favour fuh tek way de visa because once de people who dem want in Guyana then it hard to get dem. That is why nuff of dem still got dem visa.
And talking bout visa, it look like only de Foreign Affairs lady and Uncle Donald got visa to de States. Rob Bert own expire and everybody know that Irfaat can’t go.
Talk half and wait cut half.