Dem boys seh…De budget get chop up and Robeson happy
People got to be fools to believe that a company that mekking millions of dollar every year gun knock off some people because de government ain’t giving it money. This company mekking more money than any television station in de country but because it ain’t get government money it gun shut down.
And de staff believe because dem keep a candle light vigil outside parliament. De rain come down and sprinkle de candle. Dem people coulda ketch cold and since dem believe that dem ain’t got wuk dem boys want know wha dem woulda use to pay de doctor.
Anyhow, this nonsense about job cuts is a joke. Dem give Fip money fuh de road and when Fip fall down dem find more money. Dem boys want know wheh de extra money come from? When dem cut de ads from de private media nobody ain’t lose dem job.
But nuff people cry because de money that dem coulda put dem hand pun, thats some of de money that get cut. De budget had a lot of extra money. Even Fuzzy use to get extra. Now he got to live pun de bare revenue and he vex.
But is de cut fuh GINA that really hurting de staff. Dem use to use de money to operate Blog and to create mischief. Knee Ass and Kwame and all dem rest had money fuh burn. De money gone. Dem boys seh that dem waiting fuh see how dem gun cut down pun phone bill and if dem gun lef on all dem lights and if dem gun tek de vehicle and sport whole night.
Robeson get spare. Dem ain’t cut nutten from he suh he can build de airport. He can do nuff thing wid de Harbor Bridge and he got money fuh buy nuff hammer fuh demolish illegal structures.
Is now dem boys understand why he didn’t cut de ribbon at de airport. He didn’t have any scissors. De opposition had all.
But Uncle Donald vex. He threatening fuh call snap elections and done this nonsense but dem boys warning he that he might lose corn and husk. He plan to meet wid Uncle David and warn he bout Khemraj. He done seh that Khemraj is a trouble maker.
Talk half and wait fuh de next half.