Dem boys seh…Even de police get like de Bees
De police got a motto—Service and Protection. And nuff of dem living up to de motto. Dem serving demself and dem protecting de assets that dem tek from people. One of dem was dealing in drugs. He was providing cover fuh a drug operation.
De man he protecting sell ganja to a man who give dem copper fuh gold. This policeman tek de copper and try fuh sell it and that is how everybody know was not gold suh dem kidnap de man.
Is suh dem boys know why nuff crime don’t solve. Some of de police ain’t bright. De policeman call de man family and tell dem fuh send de money. Then dem go and stand up at de spot wheh de man was to drop off de money.
Dem boys want to know if dem didn’t expect de police fuh come. That is how dem get ketch –while dem waiting fuh de money.
Then dem have a commander who does operate like if he put gold in de bush. Dem boys seh that it got to be that all dem police like gold. This commander tell all he ranks who wukking in de interior that when dem come out dem got to bring one ounce gold fuh he.
Now dem boys understand how police can wear all dem gold and drive fancy vehicle. That is why people does try fuh avoid telling people that dem get rob because de police gun go after de thief and tek de money.
A woman who husband beat she and put she out tek too. She and she husband had a story. De man beat she and she run to a neighbour. Instead of giving she lodging, de neighbour carry she to another neighbour. Was nice because she get a place fuh rest she head but she didn’t rest she eye. It light pun de man TV.
De next morning as de man step out de woman step out too, wid de TV. De man had to get de police fuh help he and dem boys ain’t even sure that he get back he TV. If he ain’t get it back is because de police find it and tek keep it fuh demself.
Is sheer thiefing going round and it all start at de top—right up at de top and is not Uncle Donald.
Talk half and try hide de other half.