Dem boys seh…Jagdeo just like de thiefing Nigerian governor
A governor in Nigeria going to jail because he inflate nuff contract and then he tek he kickback from dem same kantractah who he give de contract. De man salary couldn’t give he all dem things he end up wid. He full out a tax form and he tell de people that he don’t own nutten overseas and that he ain’t got no bank accounts overseas.
De man had US $250 million in thiefing money in couple overseas bank; then dem find out that he had a private jet; he had top of de line cars and now he going to jail—pumpkin jumpsuit fuh he tail. And he gun wear dem till he dead. Does this mek you think bout anybody in Guyana.
When dem boys hear de story dem think bout Jagdeo who seh that he ain’t got nutten. Is only that we in Guyana got to do some digging to find all. Dem boys know wheh plenty deh. If this Nigerian was a governor and he got all dem things, imagine wha a man like Jagdeo got.
Jagdeo and de Nigerian get de wuk de same year–1999. De man was governor up to 2007. Jagdeo stay as de boss till 2011. This man thief US$250 million. That is de Norway Funds alone promised to Guyana. Imagine wha Jagdeo got. De man had a jet and Jagdeo got a Jet but wha he got get EZ (easy) in front of it. Dem, boys seh that dem wouldn’t surprise if he got another jet too because he like travel steady.
People begging de Americans fuh help dem check he bank account but if he smart like de Nigerian governor he guh hide de money in other people name. De Nigerian governor did hide he money in he wife name and he sweet lady name and in he sissy name. All of dem heading to jail.
Jagdeo ain’t got wife. He beat she and put she out. He probably got a sweet lady but he got nuff sissy. He also got he best friend Bobby who wife filing fuh divorce and claiming half of de wealth.
Now since Jagdeo money tie up wid Bobby own, then Bobby wife can carry way Jagdeo money and Jagdeo too. Dem boys seh that Brazzy is Guyana governor. He is de man who does handle everybody money just like how de Nigerian lawyer was handling he own. He think he is a smart man. De pumpkin jumpsuit waiting fuh he and dem got all size.
And is a funny thing that de governor get ketch because dem boys seh that he was coming to Guyana. Jagdeo invite he fuh tun back and rob he too.
Talk half and don’t think bout thiefing de other half