Dem boys seh…Jagdeo ain’t got shame
Some people get ketch and is de hydroclave mek dem get ketch. Dem claim how dem spend US$1.5 million and how because de World Bank check everything clean. Dem boys know that de World Bank people crookish too.
De hydroclave contract was fuh US$950,000. De Georgetown Hospital tell we that but dem also tell dem boys that dem didn’t know nutten bout de whole hydroclave programme. Dem lie because when dem get ketch dem release some information that only people who know bout de thing coulda talk.
Is suh people hear how de contract was fuh how much. But de story get more sweet. When de boys look dem see thiefing all round. De hospital talk how it build a shed fuh $60 million. When dem look at de shed it couldn’t cost even half of that. Leslie was de Minister and he had nuff friends in de Hospital. De contractor and de people at de hospital was friends too.
Well de things getting hot because all of a sudden people running and hiding. Dem stop answering questions and one of dem trying fuh mek up de books.
De thing is that all this happen when de Rat was President. Money share. But dem boys seh that wha sweet in people mouth does be bitter in dem tail. Dem talk sweet and dem clapping hydro pun people. Jagdeo giving old people hydro too. He got dem drinking water when dem hungry. Every old people is now a mini hydro because dem full of water.
Wha mek dem tun hydro is de $13 a day wha dem get while he tekking $100,000 day. Guyana is full of hydro. It got hydroclave, and nuff old people wid hydro seed. Jagdeo ain’t got shame though. He walking proud but de amount of money he got to fetch can mek he and all get a hydro.
That is when dem boys gun pelt he and not fuh knock he anywhere else suh that he must always remember that old people got to get respect. Every brick gun mek he remember.
Talk half. Respect de other half.