Dem boys seh…People now know how Bar Rat cheap
When is Christmas people does talk how too much food deh round and dem can’t eat. But dem same people does guh to dem friend house and eat like if dem never see food. Dem boys seh that dem is de people who does cause dem friends to call pun de government fuh more pay because de food done.
Some people does wait fuh de holiday just to visit friends but dem don’t invite nobody to dem home. Dem is de cheap people. And dem boys talking bout how dem have nuff cheap people. Bar Rat build he house. When a man house done he does got a house opening.
De man move in de house and he ain’t even open de place. Dem boys seh that he don’t want spend he money fuh entertain. If he was still in Ohh Pee he woulda got a big soiree and he woulda invite de whole country. People wouldn’t realize that is dem own money was paying fuh de sport and nuff of de people who money was spending wouldn’t get invite.
Dem got others who building near to Bar Rat. Dem gun got house opening and dem boys want fuh know who gun be de first. Right now some of dem running behind de contractor because dem try fuh live big and when Bar Rat was in office dem was certain about money fuh finish de house. Now that de Big Rat gone some of dem begging de contractor fuh finish de wuk and wait fuh dem pay.
One man beg de police fuh issue a warrant fuh a contractor. Another one lock up de contractor in de house. Is a fun time. That is wha dem boys seh.
Talk half. Lef half.