Dem boys seh…Wait fuh de whole cat
This is de last hoorah fuh Bar Rat and he can’t tek it. But he cause one thing fuh happen. He mek people get quiet. Is not that these people dumb. Is just that dem frighten. Dem coulda talk bout all de things that happen but dem keep dem mouth shut. Now dem whispering how dem waiting fuh he guh out.
But dem boys talking all de time. Dem got a trend from day one wheh dem does talk half and lef half. Now dem plan fuh let de whole cat out of de bag.
Imagine dem boys only let de cat foot out de bag and de whole country get excited. Imagine wha gun happen when dem let out de whole cat.
Dem boys seh that a man who does wuk at de Waterfalls paper and who get a slight stroke and lose some of he memory ain’t forget that Bar Rat is a scamp. De man seh that he lie down pun he hospital bed and remember some of de things that Bar Rat do to people and de country. De man seh that he know that he forget nuff thing but he nah forget nuff things wha Bar Rat do. He and all seh that Bar Rat and all he kavackamites got to guh to jail.
Well is de exposure and de call fuh dem guh to jail that hurt de man mek he calling de Waterfalls boss names. He call he snitch, backtracker and beat man. Now he call de man salempenter.
When de boss man hear he seh that is true. He use to sell wildlife but he never ketch Bar Rat. That is because he always know that Bar Rat have no value. He woulda dump him anyhow if he did get ketch in de trap.
But de boss man seh that de names don’t matter; that Bar Rat can call he anything but he can’t call he a thief. He never thief like dem. No name, no warrant from de treasury. Dem can’t enjoy de money.
Dem can’t enjoy de money because dem start fuh hide. He Bar Rat tell Bobby fuh stay in de background and hide at certain places. If you think dem boys lie watch and see fuh youself if de Bees does deh at de rally. And if dem deh, wheh dem does deh. In de background.
Talk half, and wait fuh de whole cat out de bag.