Dem boys seh…Wha happen to Sam?
De people tun out fuh show dem appreciation fuh de Big Man but not one of dem seh farewell to Sam.
Sam was a nurse maid to all of dem. He sit down in he corner and he do wha dem want he do.
Dem want he declare a state of emergency when Cheddi lef de country and he do it. He do it when de Big Man lef and he do it.
When Fip come wid he lies was Sam who spearhead de campaign fuh mek Fip continue.
Was he who tell dem fuh mek Fip equipment lies tun a reality because Fip nevah build a road but he put in a bid fuh a contract fuh de hydro road.
Was Sam who tek de wuk and he dog get shoot because it attack a security guard who had no calling in de yard. Was Sam who tell de nation that he was serving de people of de country and resign when he get vex. De only thing is that de Big Man refuse to accept de resignation.
Dem boys seh that was de same Sam who drink kero to show that he loyal to de party. But de people don’t appreciate Sam.
De only man who put he belly out fuh de government and nobody ain’t want spend money to appreciate Sam.
Dem boys seh that dem gun kick he now because Donald done decide that he want a new Prime Minister.
De man try wid he minibus and dem police rob he drivers because den know was Sam bus and dem had to get a steady raise.
Somebody got to appreciate Sam. De man lef Canada and come home. De man sacrifice a future in a foreign land unlike dem other Guyanese.
Christmas Day a lady promise to bake a black cake fuh Sam but people got to do something before that.
Talk half. Lef half.