Dem boys seh…People planning fuh cut off dem pickney middle finger
Haier. When dem boys see de name dem think was somebody who spell ‘hair’ wrang. Then dem realize was a Chinese company and it didn’t come fuh open a cookshop. Then dem boys see this ad in a place wheh people don’t see nutten.
Dem have a saying it is better to let people think yuh is a fool than to open yuh mouth and remove all doubt. De Lunchman sit down in de court on Monday and tell de Waterfalls boss man that he gun release de statement of how much de material cost to renovate that NIS office.
But a day hardly pass when he gun tell a reporter that de Waterfalls boss man got to release he statement of de cost of de material fuh de places that he mek de comparison wid. Dem boys want know since when de Waterfalls boss man is a contractor. It just show that when some people get ketch dem does open dem mouth and prove that dem is a fool
Up come de same Lunchman and he tell de world that this Haier win de bid fuh de laptop. He didn’t tell dem that one of de Bees put in de bid fuh de Chinee company; he didn’t tell dem that de same Bee actually put in two separate bid fuh two Chinee company; and he surely didn’t tell dem boys that this Bee is de Big Bee good friend and that he got Chinee roots.
Wha mek matters wuss is that de Lunchman didn’t tell dem boys that this Bee and de Big Bee went to China and meet wid dem same Chinee people. Now dem boys know why dem cancel de fuss laptop bid although a local company did qualify.
By de time de year done dem Bees gun own all de country. Dem boys seh that dem already own three-quarter. But dem boys warning people not to wave at de Bees. De longest finger pun yuh hand is yuh middle finger, suh when yuh wave it gun stick out more than de rest, and that is a charge. At least de Big Bee mek it one.
Now people planning fuh cut off dem pickney middle finger when dem born. But dem boys remember when Papa Cheddi use to talk he always had de middle finger sticking out and he never get charge. Even de Big Bee copy it.
Dem boys seh that some people believe that de middle finger is to sit down on. That is why one ‘shim’ inside Ohh Pee don’t wuk. He always hiding he middle finger and smiling.