Dem boys seh…Guyanese always hungry suh dem can’t stage hunger strike

People in India get vex wid dem government suh nuff of dem decide that dem gun guh pun a hunger strike. De man know that dem leaders corrupt and he talk but nutten never use to happen. Instead, dem leaders use to thief more.
Things reach de stage wheh de whole country mek noise. Dem start fuh support Anna Hazare when de man  refuse to eat. Fuh twelve days he refuse food. Dem boys seh that was not a fat man who had surplus fat to protect he. Was one ordinary man. People start fuh see skin and bones. Even de doctors get worried.
De news and de pictures shock even dem who use to thief. De thiefing people get frighten because if Anna Hazare did dead dem know was a riot. De thiefing people beg he fuh eat and he refuse. He seh that he rather dead than watch dem continue fuh thief de people money.
De parliament announce that dem gun give in to Hazare demands.  Dem boys seh that a hunger strike wouldn’t wuk in Guyana because de people hungry all de time. And besides de thieves don’t care who dead.
These same people does guh to India fuh help. Before Hazare, de same thiefing people use to help wid money because dem use to get a cut. People expect that fuh change and all because one man seh that thiefing got to stop.
When he talk de fuss time dem lock he up fuh talking. Dem boys seh that is de same thing in Guyana wheh dem want lock up de people at de Waterfalls paper fuh talking bout de thiefing.  People now understand why de government paying such small salary. Is fuh keep people hungry suh even if a man guh pun a hunger strike de thiefing people gun seh that he is just another hungry man who want food.
That is why people want lock up de thieves and force dem to go hungry. Dem have a couple who gun survive but dem gun know de commandment Thou shalt not steal.
Talk half. Lef half.