Dem boys seh…De Chinese tekking over
Dem setting up cameras all over de place because Clement claim that he can’t see everything and people ain’t telling he nutten.
Well dem boys know that he can’t see nuff things, not even de goat that bite he and fuh sure he couldn’t see de problems he woulda cause when Bar-Rat put he fuh act as Prime Minister and give he a car wid siren.
He getting cameras fuh help he see wha happening. That is why he set up some cameras by de seawall. That was de first set of cameras that went into action. People does use de seawall fuh all kind of thing and some of dem thing is wha Clement want see. Then dem boys seh that dem notice how certain people in de government learning to talk Chinese because all of a sudden dem and de Chinese is friend.
Every Chinese who apply fuh live here got to pay fuh de application and he got to pay de government people.
Dem boys seh that dem tek so much that now that de Chinese people putting up an illegal construction near Celinas, de government people can’t seh nutten. When de City Council realize wha happen a whole heap of dem run to de same Chinese people and dem tek dem share.
And dem boys seh that is because de Chinese sharing that de man who like stage beauty contest try fuh get a land near de Chinese Embassy. He plan was to eat at de Chinese every day.
And is de same reason that de government sending people so steady to China.
Talk half. Lef half.