Dem boys seh…Dr Leslie got to ban liquor
Was sheer accident over de weekend. Car crash by Banks DIH, photographer kill man pun Sheriff Street, man drive overboard and dead.
Dem boys want fuh know if is some demolition Derby wid car playing. And wha got people worried is that most of dem who getting in accident drinking like if dem is fish.
People claiming how liquor and driving don’t mix suh dem people drinking then dem driving, keeping de two activities separate. When anything happen dem does claim how dem did done drink before dem drive; dem wasn’t drinking and driving.
De police got to come up wid a new campaign. It got to be don’t drink then drive. But dem boys know wha does happen.
When a man drink he does see two road and he does always tek de best one. Is only that tree does walk cross de road.
Post does move and people does always deh in de same corner that does choose to run across de road.
A certain man who is a reporter and who like drink, crash into a park trailer. He come out smiling because de trailer suddenly swing in front of he. That is wha he tell de police. This time de trailer park and it didn’t even have a tractor.
De police tell he to stand on one foot and he fall down. He tell de police that de road shaking. He gone back in hospital because he got problem wid he head.
Dr Leslie banning cigarettes because dem killing people. Dem boys want to know when he gun ban liquor. People drinking and getting strokes. And some of dem does bun down house when dem go home.
Some does shoot up and get post to Brazil; and some does molest young gyal.
Talk half. Lef half.