Dem boys seh…Rob-Bert got to face up or ship out

Old people does challenge anybody who like talk to ‘put dem money wheh dem mouth deh.’ Rob-Bert got to put he belly wheh he mouth deh. He jump up and talk fat because he get vex.
Dem boys claim how dem spent too much money pun de sugar packaging plant when people in Africa spend less and packing more sugar.
Dem boys see spit fly from Rob-Bert mouth corner. He throw out he belly. He holler how he gun open up de thing for a forensic audit and Chris Ram and Uncle Glenn and de Waterfalls paper gun have to pay.
He didn’t bargain fuh de response. Dem boys tek up de offer and dem want start Monday. Dem allowing Rob-Bert to spend de Independence holidays in style.
Rob-Bert think that when he claim that Uncle Glenn and Chris Ram gun pay he woulda get dem to back off. Well he mek a big mistake because de two men got money. One of dem send a message to Rob-Bert that he didn’t have to thief.
Chris Ram also send a message. He claim how he mek he money auditing. Dem boys seh that dem hear Rob-Bert belly growling now that dem men accept de challenge. Gas even escaping elsewhere and people wondering whether he pipe bore.
Is one of de few times that dem ain’t hear a word from Bar-Rat. Dem boys seh that dem sure that is Bar-Rat put words in Rob-Bert mouth but whatever the case boat gone a falls and Rob-Bert seh that he ain’t bluffing. Dem boys waiting.
Talk half. Lef half.