Dem boys seh…Some people thief till dem stomach rotten
Flyers circulating like mad. Dem got dem flyer all over Berbice and Essequibo. But dem wasting dem time because is like telling a li’l boy not to watch blues.
Imagine that dem got de nerve to print flyer telling people not to buy de Waterfalls paper. That tactic might wuk wid de Chronicle and de Hard Times paper wha nobody don’t see anyhow.
In fact, people don’t want to see, feel or touch dem paper because a smell coming from right deh. It smelling wuss than that thing that dem throw pun Uncle Freddie. And dem very big one smelling suh more than anything else because is dem own. Dem thief till dem belly rotten.
Dem thief fuh print that same flyer. Dem boys seh that dem had to find wuk fuh thief more. And dem put out de flyer because dem boys expose all de wrang thing dem does do. Dem a build road fuh $10 and tell people how de same road cost $10 million. Dem build a sluice door wid two cork wood worth $5 and tell awee de sluice cost $25 million. And de door nah even putty much less tar.
Dem boys only name two but is nuff thiefing. Nuff, nuff, nuff. Everybody know, everybody see but only de Waterfall paper does talk.
That is why a big man tell dem boys that dem does only talk half and lef half because that is all wha we know. Talk half and lef half. He seh that he know everything and he gun talk all in de right time.
De exposure is suh much that dem get vex. Dem boys seh that is dem own face. De Waterfalls paper watching dem and every time dem thief de paper talking.
Dem actually offer de Waterfalls paper big money fuh keep we mouth shut but dem boys can’t thief and dem can’t watch thiefing and seh nutten. Dem momma and daddy didn’t bring dem up suh.
Dem boys been to all dem church and masjid and Hindu temple. Some of dem is Baha’i and some is Jehovah Witness.
Dem boys seh that dem other people Momma and Daddy bring dem up funny. Dem thief in front of dem and dem people develop de habit. Dem now thiefing in front of dem parents and dem children and dem wife.
That is why something spill and it smelling.
Nutten or nobody can stop de Waterfalls paper. Not de PPP, de PNC de AFC and all dem other ‘C’ can’t stop de paper. Nuff people believe in de Waterfalls just like how dem believe in de Koran, de Bible and de Bhagvad Gita.
Talk half. Lef half.