Dem boys seh…Kwame get a cutback from dem protester
De race over. Everybody know who gun lead de PNC into de elections. But is de final count that mek people wonder whether people ain’t set up some people. Dem boys seh that when Faith walk in dem women call out something bout woman power.
Dem same woman vote fuh a man. Dem two lawyer man get couple vote but dem boys seh that dem nuff people who got case better find other lawyers because dem gun do like wha some politicians use to tell people who guh to dem fuh help. “You all didn’t vote fuh me.”
Freedom House was monitoring de elections.
Dem had to know early who is de candidate because dem had to decide who dem gun use fuh launch de attack. Kwame is dem fuss choice. Dem boys seh that one way or de other he gain another messy job. And he does get good pay. De other day he get $50,000 fuh pay 10 protester. De man mek a profit because all dem protester had to give he a grand after he tell dem that once dem ain’t give he a cut back dem wouldn’t get pick de next time.
And is now he miss he visa because he did tell Bharrat that he was prepared to go to de States after de gyal dem knock off. He can’t even go to de beacon, according to dem boys. But is a funny world. De gyal is a PPP member and dem boys now want to know if everybody at OP, except Bharrat, is PPP. Bharrat is OLPF—one laptop per family.
Talk half. Lef half.