Dem boys seh… Mash lef nuff problems
Nuff people tired. Nuff of dem gun tun up at de office wid sore foot and stiff joints. Some of de men gun have a king size hangover. De weather people talk bout rain but it was sun. Was like if de whole country challenge de elements.
And de floats was nice. Dem gyal hardly had on clothes and dem wine till dem hips hurt. Was Mash like fuss time. People walk wid dem food basket and children didn’t have to worry about school.
Dem had some Ministers who shoulda go to dancing class. Dem had people going to keep fit class. Dem boys see Irfaattrying to Mash and he was all over de place, out a time.
He was a Mash by heself.
But a new problem start. Money spend and of course nobody gun come up wid de accounts because that is a problem since Cricket World Cup. Dem boys seh that this problem date back to de flood of 2005.
Carifesta come and was de same problem. Nobody coulda account fuh de money but some people end up buying car.
Of course, de City Council got to clean up and dem complaining how dem don’t have money. Dem boys want to know why people can’t walk wid garbage bags. De place does look horrible de day after Mash. Dem boys seh that one day somebody gun get vex and call off Mash.
But talk fuh rain and talk fuh sun. Dem boys miss dem Brazilians and de gay crowd. Dem wanted to see Kwame and he gang. Because Kwame was to be in de float dem postpone Sharief funeral. Dem boys seh that if OP did insist on the funeral poor Sharief woulda have to bury heself.
Today though, is a different story and may de Supreme Being have mercy on his soul. He need it after wukking wid Kwame. He had to cuss nuff days.
Talk half. Lef half.