Dem boys seh…Kwame on de prowl
People does feel that dem big when dem pose wid de President of a country. Some does feel great when dem eat wid de President and some does believe that dem is de best thing on de planet when dem hug up de president.
Well this woman who get knock off at OP actually hug up Bharrat. Dem boys seh that dem look like lovers and everybody sure that she was untouchable. But sometimes when things like that happen people does wait before dem mek dem move.
People who use to trouble Burnham women always use to wait till Burnham tun he back or when he and de woman fall out.
This time Nanda wait till Bharrat back tun and like de lion who want eat de baby hippo, he pounce. Marcelle out of a job and all because she hug up Bharrat too tight. She shoulda know that wid Kwame around some jealousy had to be involved.
When she get knock off and dem boys approach Kwame he throw he chest in de air to reveal he Maiden form bra. Then he claim that he don’t like opposition and that de woman was cutting out any chance he had fuh hug up Bharrat.
He already vex because Bharrat refuse to look in he direction and always watching real women. Well dem boys seh that dem women got to watch out. Kwame on de prowl and a spurned body (pronounced batty in American) is a dangerous thing.
Talk half. Lef half.